三冠王到底有冇含金量高低之分？2001年嘅曼聯球迷答有，因為佢哋喺利物浦啱啱攞到英聯盃、英足盃同歐洲足協盃三冠後，炮製咗一幅名為「米奇老鼠三冠王」（Mickey Mouse Treble）嘅橫額寸宿敵攞埋啲A貨成就。紅軍名宿加歷查睇嚟對呢件事耿耿於懷，周五喺英國《每日郵報》專欄舊事重提，問吓2017年袋咗英聯盃、仲爭緊英足盃同歐霸盃嘅曼聯球迷仲敢唔敢答有？
其實加歷查又唔算好寸嘅，除咗承認曼聯可謂英超最「弗」球隊之一，而且歐霸盃冠軍嗰張來屆歐聯入場券亦令利物浦流晒口水，但佢都煞有介事咁話：「我唔係將嗰次三冠同歐聯、英超、英足盃嘅三冠比較，但唔好同我講三冠王呢件事唔特別，如果今年曼聯攞到三冠亦然。當然，我會話16年前嘅歐洲足協盃級數高過當今歐霸盃，因為我哋嘅對手包括奧林比亞高斯、羅馬、波圖同巴塞隆拿，先至入到決賽贏艾拉維斯。曼聯呢？就算要遠征俄超羅斯托夫都應該贏到，之後最強對手只係得史浩克對慕遜加柏、羅馬對里昂呢兩場嘅勝方，曼聯應該有力擊敗佢哋；最難嗰關應該係英足盃8強作客車路士，但唔好睇小摩連奴復仇嘅決心。」
另外，加歷查早幾日喺twitter同李斯特城右閘丹尼森遜駁火，事緣加歷查批評李城兵應該為hea踢導致雲尼亞里下台感到羞恥，搞到森遜用利物浦冇攞過英超冠軍嚟還擊，呢位紅軍名宿當然冇認低威，再喺專欄寸森遜隨時做到一樣自己冇面對過嘅事：降班！