近年新盤流行開放式廚房，主因地方細，廚房無牆阻隔，客飯廳望落好像大一點。事實上，在室內設計的範疇，將廚房改為開放式，通常與大廳擴空有直接關係，少了間隔牆，客飯廳與廚房相連無阻隔，三位一體，視覺上可以望通，實際上可以擴展活動範圍。為開放式廚房適當地添加裝飾，可以為單位帶來不一樣的觀感，例如特製一張金屬不銹鋼吧枱，多了閒坐小吃的地方，選材上銀色冰涼冷酷，配襯相同物料造廚櫃，內外發亮，搶眼醒神，顯現型格個性，勝過新盤樣板式倒模設計。
記者：溫潤潔
攝影：周智堅
吧枱由高低兩部份組成，向客廳造高腰枱面放飲品，向廚房是洗碗盆及工作枱面。一般而言，工作枱面留空窿位安裝現成鋅盆，但這個設計是在相熟的廠房特別訂製洗碗盆連工作枱面，整套一件過無駁口，順滑零膠邊，包保滴水不漏。
廚房吊櫃及高櫃以不銹鋼造櫃門，同樣具帥氣，拉開高櫃附層架放調味品很實用，有外表有內涵，所採用為高質量的304不銹鋼，純度較高、較堅硬及耐高溫，除非使用腐蝕性清潔劑去抹，否則不會生銹。
空間感在乎睇得見，雜物寧願收收埋埋，梳化旁造深木膠板隱藏櫃，好處耐磨防花，仿真度高似一幅木牆，沒打開暗門，不知可以貯物。然而，隱藏櫃色調沉實，又怕侷促，偷空凹位當角几用，坐梳化時有闊落感覺，不會頂手頂腳。櫃底加設有轆抽屜，將來可以放小朋友玩具，避免分散各處，一片凌亂。
飯廳呈窄長形，設計慳位至上，牆貼造卡座坐得人多又親密，底層作為貯物箱，收納不少東西，往客廳伸延開去變成電視地櫃，直達大門旁凹位，填滿造鏡面薄身櫃，存放雨傘及細小物品，五臟俱全，功能比想像多。卡座貼牆靠背鋪淺木，外圍深木曲尺框，對比鮮明，與客廳起分區作用，框架頂部鑲射燈加強照明，解決光度不足的問題。
歡迎讀者提供單位拍攝及介紹，請將資料傳真2370 3886或電郵mailto:[email protected]