近日不斷有消息指，中聯辦正大搞小動作，防止提名奶媽林鄭月娥嘅選委，喺投暗票時「走票」，而且仲升級到搞白色恐怖！前日知名梁粉、牙醫陳健強就喺親中報章《商報》撰文，揚言喺高科技年代，只要驗選票上嘅手指模，就可以知道邊個選委轉軚！佢呢番言論唔只令選舉事務處發聲明澄清，仲隨時犯法。
陳健強寫咗篇題為「暗票陰謀令人擔憂」嘅文，喺文中大搞白色恐怖，佢話現時最令人憂慮係所謂「明暗票」陰謀，聲稱「在當今的高科技年代，無論是按投票次序、提名票與選票對比，以及選票沾上的手指模，若以為暗票就等於隱身，根本就是自欺欺人」。
佢呢番言論已等同視香港選舉法例如無物，選舉事務處噚日就發出嚴正聲明，話根據選舉條例，總選舉事務主任宣讀選舉結果後，要妥善保存選票及有關選舉文件6個月，除非根據法庭命令，否則其他人都不可檢查任何選票，所有選票亦會喺限期屆滿時立刻全數銷毀，話要嚴正指出驗指紋能查出投票意向嘅傳聞，係「毫無事實根據，亦是法律所絕不容許」。
林卓廷指涉違選舉例
做過廉署調查主任嘅白鴿黨立法會議員林卓廷就話，陳健強上述講法已對選委投票構成壓力，涉嫌違反《選舉（舞弊及非法行為）條例》，係佢首次聽到啲咁赤裸裸威嚇選委嘅言論。法律界立法會議員郭榮鏗就話，將就投票保密安排約見政制及內地事務局局長譚志源，唔會因為當局發出上述聲明就「收貨」喎。
李八方