呢排建制派係咁攻擊曾俊華，自然連提名曾嘅民主派都要打埋一份，要抹黑民主派，左派傳媒又點會放過佔中三子之一、搞緊民間特首嘅戴耀廷！噚日左報《大公報》圖文並茂咁話索羅斯同戴關係迷離，又用索羅斯有關基金捐錢畀港大法律學院，影射戴有收索羅斯錢。
戴耀廷睇完篇報道，就喺fb發文，仲好幽默咁反駁《大公報》抹黑，話佢見過，佢真係見過索羅斯！咁幾時見過呢？咪喺《大公報》張設計圖片入面，佢「見過」索羅斯囉！戴耀廷仲自嘲話，佢都想《大公報》講嘅係真，如果索羅斯真係捐錢畀佢搞特首民投，咁佢就唔使仲愁緊唔夠錢搞啦！
戴耀廷又冇收錢、又俾左報屈，真係愁上加愁，不過佢亦不忘反抽《大公報》水，話如果任何人想同索羅斯有「迷離關係」，咁就要立即捐錢畀民間公投！