任天堂部新主機Switch噚日正式開賣，八方就冇咁好彩可以第一手玩到，反而民建聯陳克勤就好好彩，出席活動嗰陣抽中咗一部，噚日立即試玩咗炸彈人，唔知佢又點睇老任呢部新機呢？
唔講你唔知，立法會內除咗外號「電競聰」嘅香港眾志羅冠聰、新民黨容海恩之外，克勤仔都係機迷。呢次佢有幸抽中部新機都大呼好彩，當然亦都會向立法會申報啦！
玩過部新機一輪之後，佢形容Switch個「芒」確係幾靚、部機亦唔重，手掣又幾好㩒，只係部機有啲大，而且首發同時有唔少適合一班人玩嘅獨佔game。不過佢就慨嘆議會工作忙，自己都冇乜時間打，部機都係留畀議辦嘅同事玩。