特首候選人薯片叔叔曾俊華又有新花臣喇，推出「字遊十八區」計劃，即係將佢嘅競選口號「信任」、「團結」同「希望」3組詞語化成人咁高嘅模型，巡迴全港展出，就連薯片叔都換上新款卡通look，成個漫畫《男兒當入樽（Slam Dunk）》入面個安西教練咁款。
噚日薯片叔見完傳媒就安排大家到佢競選辦所在嘅合和中心門口，睇吓佢嗰3組大字，原來足足有兩米高、1.8米闊，佢話自己對於信任、團結同希望並唔係得把口，為咗畀大家見得到，未來3個星期都會喺香港各區展示呢3組詞，總之要同市民拍住上。
之後佢仲喺fb跪求各方好友借場畀佢展覽，宣傳品上就有個卡通薯片叔，八方一眼就認出，呢個咪就係減咗肥嘅安西教練？唔知佢班公關有心定冇意，總之網民就like爆。有網民直頭幫佢起咗個新朵叫做「John西」。究竟全盛期嘅薯片叔可以有幾多個名？
此外，原來嗰3組大字已經去過唔少地方留倩影，譬如南山邨、尖嘴海旁、舊立法會大樓等，連大帽山山頂都去過，據聞遲吓John西仲會擺埋街站㖭！