馬德里體育會今季表現跌watt，喺周四西甲又失分，作客拉科魯尼亞靠基沙文入世界波逼和1:1。不過，教練施蒙尼應該唔多關心賽果，事關後備入替嘅費蘭度托利斯同對手爭波被撞低，個頭先落地仲一度不省人事，要即刻送院急救；好彩，「王子」冇耐之後醒番，仲識上網報平安，球迷個心都定番啲。
馬體會逼和拉科又失分
馬體會作客對啱啱換咗教練嘅護級分子拉科，踢得一啲都唔輕鬆，13分鐘先失守。到下半場施蒙尼撳掣變陣，喺65分鐘用埋最後一個換人名額，由費托入替加美路；三分鐘後就奏效，由基沙文以一記禁區外遠射搞掂扳平。踢到85分鐘，費托同對手貝根天洛斯喺爭頂相撞，之後王子仲要個頭先落地，撻喺地下冇晒反應。兩邊球員見勢色唔對即刻埋去，馬體會隊長基比同守將維沙積高，夾手夾腳防止費托咬脷，前者仲被咬到㖭。
落地聲嚇親施蒙尼
施蒙尼出席賽後記招，當時仲未知道費托最新情況嗰陣話：「我哋仲未清楚目前情況，大家都好擔心同緊張，當時聽到好大聲，好怕係由佢條頸傳出嚟。」至於有關馬體會保前四嘅情況，施蒙尼就顯然唔多關心嘞，好在佢亦冇耐之後可以放下心頭大石。
費托喺受傷後好快就被送院，球會亦喺twitter公佈佢被送院嘅消息。費托留院一晚接受詳細檢查，好在腦部冇嚴重受傷，喺周五已經出院。王子亦即刻喺網上報平安：「非常感謝各界嘅關心同鼓勵，好彩今次只係虛驚一場，希望盡快復出。」相信下周日馬體會迎戰華倫西亞場西甲就唔使預佢喇；而費托前屬球會車路士、利物浦同前隊友杜奧巴等，都先後出post祝福佢。