香港同廣東省自從1979年以來，每年都會合辦省港盃呢項足球盛事，賽制係主、客各踢一場。過去39屆省港盃中，廣東隊贏出24次，香港隊只係贏過15次，成績不及廣東隊。
明明呢道係馬圈，為何忽然談起足球呢？因為於賽馬方面，在2004年首次舉辦的港澳埠際賽，性質類似省港盃，港澳兩地都會派出各自的馬匹在香港沙田馬場及澳門氹仔馬場對賽。
由於兩地馬匹水準有別，故港澳盃除04年「皇冠禮物」及10年「爆料」代表澳門獲勝外，餘下11屆都係港隊天下，均由港馬勝出呢項盃賽。
今年會否由澳門隊威番次呢？睇嚟真係唔容易，事關陣中港隊有八匹馬，澳門隊只有六駒，港隊比對方多打兩件，而且港隊代表有「旌暉」打前鋒，呢匹長跑長有的辣椒仔今季已經入過三粒，對方要防守佢唔係一件易事。
更何況仲有大摩一對神鋒「飛來猛」同「無敵飛龍」壓陣，其中「飛來猛」更加係上季港澳盃盟主，今場強勢衞冕，跑1400米首本路程當然有權添食。
大家亦千祈唔好忽略主隊兩匹後起之秀「世澤之星」同「宅大大」，事關佢哋今季已經各自起孖，順起上嚟再入多粒有乜出奇呀？