薯片叔叔曾俊華喺網上民意支持度高好多人都知，但原來有班「薯粉」走出現實世界，落手落腳撐薯片叔叔，最近有一班市民就自發成立撐薯片叔叔組織「薯仔」，準備喺距離特首選舉投票廿幾日內，同薯片叔「拍住上」。
噚日3名薯仔發言人就約見傳媒，講解組織理念，包括做過7年政務主任（AO）、現任公共事務顧問嘅譚仲麟；做過懲教主任、現為「曉民教育」董事長嘅謝尚偉，佢現時仍有公職在身，包括出任中策組特邀顧問等；同埋任職企業公關嘅王詩雅。
望香港變有規有矩
點解呢個組織叫薯仔唔係薯粉？本身係喇沙仔嘅譚仲麟話，因為成員都係冇權、冇勢、冇票，英文叫「small potatoes」，中譯叫薯仔就啱晒，佢話薯仔核心成員有20至30人，當中只有少數係喇沙舊生，大部份成員都係跨專業嘅年輕人，包括律師、教育、設計、傳媒、搞startups、連學生都有。
至於點解撐薯片叔叔？謝尚偉就話，過去喺懲教署工作、見到唔少為爭取理想嘅年輕人入獄，內心好大感受，希望社會將來唔再出現鴻溝，執法人員同市民可以建立互信。王詩雅就話，香港過去幾年花太多時間喺冇建設性討論同鬥爭，希望曾當選特首令香港變番「有規有矩」。
呢班薯仔前日同薯片叔首次見面時，都話希望可以幫手拉票，但現時未定具體拉票工作，有可能周末落區幫薯片叔叔宣傳，但具體行動仍要同薯片叔叔競選辦傾。
李八方