【本報訊】周焯華是一名生意人，坐擁兩間上市公司，但打開報紙財經版，鮮見他的新聞。近年他是娛樂版的寵兒，花邊新聞往往成為茶餘飯後的話題，「我無心去C1㗎，（加強語氣）從來冇專登、故意上C1」。他是太陽娛樂的老闆，簽了不少明星藝人，亦有份投資拍電影，坦言沒發過明星夢。「點解我個收視率可以高過啲明星呢？（瞇一瞇眼）咁就要問過蘋果動新聞先知喇」。
面對娛記，被問起私生活時，周焯華通常「任問唔嬲」亦不答，笑言不打算得罪娛記，只是不想答。「我對你哋比較理解嘅，你哋都係返工，唔做你冇飯開㗎嘛」雖然有時對於被娛記追訪，甚至偷拍感到不是味兒，「我當然唔接受啦，但冇辦法啦，佢哋有講對唔住㗎嘛，行出嚟影好啲嘅，唔好偷偷地匿埋影囉」。
不願成為娛樂新聞頭條，但他不諱言「可能真係喺最危險嘅關頭，真係幫咗一下」，危險關頭？「講吓笑啫」。以前已不多看娛樂版有關自己的報道，近兩年「越嚟越唔敢睇」。訪問之時，一涉及個人生活，就小心翼翼，更多次問「係咪娛記叫你問㗎」，花生友最想知「最愛是誰？」，「唔答」。
隨時隨地有機會曝光，周焯華承認頗重視自己外表，但每日打扮出門只需要半小時。「All-back」髮型是個人特徵之一，問他受訪當日花多少時間整理髮型，突然搞「Gag」，「我今日冇Gel頭，個頭係噚日中午Gel嘅」。雖然每次衣着不同，但黑色為主，「衫唔使襯㗎，剩係黑色同黑色咋嘛，我叫你返去幫我喺個衣櫃搵件衫，好難搵㗎。」不是刻意保持低調，只是「快兼懶」。
人前人後，他與家人關係密切，數名子女猶如朋友，卻沒有育兒心得，「我哋好似朋友咁，都好少教我啲朋友」。手上一盤生意，沒打算由下一代接手，「自己嘅事情，自己創造」，但會放手讓他們去闖。「唔好做一個有錢人嘅第二代」，物質生活上，未有給子女過多享受。
太陽未下山前，要處理行政工作，下山後就要做市場推廣、見客，一日做12小時，家庭生活只餘下周日及旅行。他在鏡頭前表現拘謹，時而捉緊雙手，時而緊閉雙唇，但鏡頭後，卻是幽默之人，「我都好多嘢講㗎」。訪問結束後，煙癮起，即時點一支煙作結，更爆出金句「我係有規律咁唔規律」，不明白，他解畫即是每日在同一段時間內，做不規律的事情，黎天王式幽默。