葉劉淑儀喺特首選舉提名期最後一日宣佈結束77日選舉工程。佢噚日上商台接受志雲大師訪問，葉劉一開首就話呢場選舉要感謝「田氏兄弟」，皆因大少田北俊話以後會笑佢少啲；至於二少，即係佢黨友田北辰就「好夠義氣」。
不過志雲大師忍唔住問佢覺唔覺選舉令個樣殘咗好多，一向姿整嘅葉劉聽到之後話好傷心，不過都認係殘咗，仲自爆多咗好多眼紋，諗住之後去睇皮膚科醫生㖭呀。
之前有傳過二少想退出新民黨，葉劉都認二人會有拗撬，但都係一時意氣箒，但就從來冇講過話退黨喎。學劉葉話齋，今次選戰二少真係好夠義氣，唔單只冇被撬票，直頭三番四次力數「強力部門」點樣陰招盡出幫奶媽拉票，認真唔話得，仲派唔少花生畀港人食㖭。