行銷A走上中環call客，路經左丁山寫字樓，走上嚟歇歇腳，跟住大吐苦水：「你今日寫香港法庭嘅獨立性，好似幾啱，但我昨日講咗幾句類似說話，喺地鐵幾乎俾人打呀！」吓，唔係嗎，有人咁惡死？
行銷A話：「我昨日下晝自金鐘坐地鐵去油麻地轉車，車卡上有十幾人喎，我企喺車卡傍邊同老公講電話八卦，講到七警案，我話七警打人確係犯法，法官判佢哋坐兩年監，或者重刑一啲，但可以上訴嘅，之不過啲警察家屬開大會，自比猶太人，真係不倫不類嘞……講講吓，車已將近埋站，見到一個三四十歲西裝友瞪住眼揸住樽水望我，我着得密實，又唔算靚女，佢牛咁眼𥄫實我，想點呀？突然間，佢指住我大喝一聲：『你死八婆，話警察唔啱，你係唔係香港人嚟㗎？』我俾佢一喝，幾乎嚇到跳起，好彩啱啱車門打開，我立即撲出車廂，有二個男女中學生大概亦係嚇親，跟住我衝出去，哎吔，我真係好驚呀，佢揸住嗰樽水，點知係唔係通渠水呀！」
一場虛驚啫，邊度有咁多儍佬搭地鐵呀，但此事亦可顯示香港社會分成兩派之勢，愈嚟愈嚴重。假如行銷A唔係斯文女子而係不怕事之黃絲帶，雙方容乜易先而口角，繼而爆粗，跟住打起嚟，殃及地鐵乘客？就係怕呢啲事情，左丁山平時同朋友搭地鐵，一定避免談政治，最好就係閉口不言。
行銷A問舊陣時警察係唔係惡晒可以打人？咁就要睇甚麼是「舊時」，舊到劉德華猛片四億元探長雷洛年代，行銷A尚未出世，現在嘅在任警察幾乎全部未出世。講到咁遠，警察捉人係咁惡，先打兩搥，乃家常便飯，返到差館還有其他方法招呼㖭。左丁山在旺角長大，自幼在洗衣街至新填地街一帶，見到外圍馬外圍狗字花檔林立，警察直行直過，有晒默契；一間茶餐廳老闆個仔在英文中學畢業考到衞生幫，第一日放工之後，着套整齊白色制服返餐廳亮相，幾乎所有茶客歡呼，街坊奔走相告，有大人捉住左丁山話：「你第日讀好英文呀，考到衞生幫幾巴閉！」巴閉在間茶餐廳以後冇人上門收銀吖嘛。嗰個年代係遠古史咯，有咗廉記之後，啲字花檔好快唔見晒，今天已是21世紀，仲有警察夠膽向他人施以暴力？在地鐵上大聲喝罵行銷A之西裝友，唔知係何方神聖，在地鐵車廂大聲鬧女人係死八婆，怕都係「雷洛時代」頭腦咯。