求驗客手記：
紅軍名宿今襲港咪錯過

利物浦球迷等咗好耐嘅《LFC World》終於嚟到香港嘞！由今日起到禮拜日，只要去到太古城中心嘅攤位（圖），就可以感受到與別不同嘅球迷體驗。現場除咗有一個叫《Inside Anfield》嘅虛擬實景（VR）系統，等球迷可以感受吓喺更衣室入面，同球員一齊聽領隊高路普講嘢嘅氣氛之外，仲可以試吓行出球員通道，感受幾萬個球迷向你歡呼嘅滋味！當然，最緊要係嘜實前紅軍球員路爾斯加西亞、史米沙、貝加、麥卡迪亞同埋希比亞嘅簽名時間，一於簽晒五個唔好漏呀！
如果你鍾意踢波嘅話，現場亦有一個反應超快嘅機械人守門員，只要入到波就有禮物拎。當然，唔少得嘅仲有專賣紀念品嘅檔攤，同埋一個模擬晏菲路更衣室嘅影相位，畀你同唔同年代紅軍球員好似謝拉特、菲臘比古天奴、杜格利殊又或者科拿嘅波衫影相。各位紅軍迷想知呢班名宿喺香港有乜活動，記得留意《蘋果》即時新聞。