雷神莫雷拉剛啱禮拜日（2月26日）於沙田馬場食白果，連勝43次賽事後斷纜。所謂邊度跌低喺邊度起番身，雷神今晚（1日）就喺沙田馬場重返凱旋門，佢在第二場四班泥地一哩，夥拍鄭俊偉馬房「君悅灣」一放到底，為呢匹六歲馬收復上賽谷草一哩做二奶之失，單Win及組合獨贏A2分別派63及31.5元。
「君悅灣」上仗谷草夥拍杜利萊沿欄靠放，最終不敵冷馬「威震天」影相飲恨屈居亞軍，過終點一刻此駒突然失重心挨向內欄，杜利萊防不勝防，其右腳因而撞及欄杆，賽後佢受傷至今一直未再上陣。
雷神挑通眼眉見馬弗，今次擸到「君悅灣」呢匹新座騎，馬上把握機會為自己重響勝鼓。佢呢場發揮真係一流，「君悅灣」負133頂磅及13檔起步，出閘後在外疊力搶，沿途望空蝕位，不惜和對手鬥燒亦要帶頭，直路仍有餘力堅持到底，影相短馬頭位氣走後上如飛的「獨具慧眼」，打破馬兒近兩季兼轉投鄭俊偉後齋缽，雷神留放可謂一絕。
鄭俊偉說：「『君悅灣』早段被『駿瑪』鬥燒，我都擔心『君悅灣』會受影響，最終此駒被燒下力抗到底，可見是很勇敢的馬，今場負133磅建功難度很高，升上三班仍有可為。至於季軍『歐洲巨星』是典型歐洲馬，可跑更長途程，如果場地鬆軟就更好。」
今晚頭兩場都由最重磅1號馬勝出，頭場係潘頓座騎「特獎」，第二場則係雷神座騎「君悅灣」，原本潘頓有機會包辦第一口孖寶，可惜今場由佢策騎的「獨具慧眼」追唔切做阿二，馬兒在港跑到六歲仲未開齋，三、四名分別為「歐洲巨星」及大熱門「騏名燈」，四重彩派近三萬元。