做球星睇落好威，但出街遇上瘋狂球迷，真係分分鐘有生命危險。好似曼聯中場保羅普巴，日前去餐廳食飯，差啲被球迷打，好在腳長閃得快，加埋朋友同餐廳職員幫手，先至平平安安出番嚟。經過呢件事，唔知普巴使唔使請番個保鑣呢？
食飯受騷擾唔多like
上星期一，普巴同朋友去咗曼徹斯特市內一間好出名嘅印度餐廳食咖喱。普巴咁出名，貴為當今球壇身價最高嘅球員，其他食客好快就認到佢，其中有人就想搵普巴簽名。想搵球星簽名，其實係人之常情，但都要睇時機，例如人哋開開心心食緊咖喱嗰陣突然遞枝筆埋嚟，係人都唔開心，唔想簽；普巴亦拒絕咗球迷嘅要求。
不過，可能食得咖喱多熱氣啦，呢班球迷就好暴躁，即刻發爛渣，覺得普巴唔尊重佢哋，想一齊圍毆普巴，仲有人出埋飛碟，用碟掟向普巴！普巴話晒都係世界級運動員，反應點會慢，立刻避碟兼跑去暗角走佬。餐廳職員一面報警，一面就制止呢班食咗火藥嘅球迷，好快就平息咗件事。當警察嚟到嗰陣，兩邊嘅人已經散去。
據《太陽報》引述目擊者所講：「有班人唔滿意普巴拒絕簽名，覺得不受尊重，但普巴嗰陣靜靜地同朋友嘆緊咖喱，俾人騷擾嗰陣，佢覺得唔舒服。嗰班人好似想搵普巴算賬咁，差啲就打架，好在職員同其他人阻止。」我求大俠不時都聽到球員收工之後牽涉暴力衝突，例如謝拉特、韋舒亞以至做教練嘅莫耶斯都試過（見附表）。
伊巴着波砵好雜喎
曼聯最近靠晒「雙巴」，除咗法國中場普巴外，仲有瑞典前鋒伊巴謙莫域。伊巴今季入咁多波，但原來暫時冇公司贊助佢嘅波砵，所以佢最近着過一剔，又着過三間。報道話，一剔一直贊助開伊巴嘅，但最近傾唔掂數，終止咗合作。另外，曼聯遲啲喺歐霸盃16強作客羅斯托夫，曼聯會幫作客球迷出埋搞簽證嘅費用。