過去經常發表搞笑提問嘅民建聯立法會議員蔣麗芸（圖），噚日喺立法會又有新力作。
佢喺立法會討論如何防止2017年特首選舉候選人洩露政府機密時話，現時特首選舉程序「好似好嚴謹」，但「奧斯卡都好嚴謹」，到臨尾公佈結果一刻時，卻掉轉得獎者身份，指「唔希望我哋都會出現當選人係邊個都掉亂咗，咁就大件事嘞」！
點知佢發表完偉論，立即遭立法會主席梁君彥「喝停」兼力斥：「你嘅問題同主體問題距離好遠，所以我唔容許你問！」元秋一度不服，繼續企定定發言，梁君彥見狀再向元秋警告：「你個問題同主體離得太遠！」元秋知道衰咗冇得問，就向梁哀求話：「當我冇問過，係咪？你唔好計我（提問咗）一次呀！」並喺梁君彥勒令「請你坐低」後無奈坐低。