蕭定一似乎決心要做娛樂大亨，佢旗下hmv數碼中國（8078）噚日宣佈正式推出OTT平台「hmvod」，大搞網上電影。至於線下，雖然上一次爭中環娛樂行個舖位輸咗畀英皇老闆楊受成，開唔成戲院，但阿一似乎冇放棄到喺香港開戲院嘅目標。
正所謂喺邊度跌低，就喺邊到企番起身，阿一今次再接再厲，話今年要喺香港開兩間戲院。佢透露，已經準備做裝修，唔會好似上次咁甩碌，地點就點都要保密，只係話旺區，兩間加埋有10個銀幕，預計投資5,000至6,000萬元。
阿一咁睇好香港電影市場，但唔知近期「燈力十足」嘅「蕭生」蕭若元又睇唔睇好自己個仔盤生意呢？