今晚（1日）沙田馬場跑泥地夜馬，一開場第一場五班1800米泥地就爆冷，蘇偉賢馬房「特獎」之前13戰零上名零獎金，呢次用番季初騎過的潘頓，後上一攻而破贏半馬位，令人耳目一新。呢匹五歲愛爾蘭自購馬首戰泥地首度上名即開齋，單Win及組合獨贏A3分別派80.5及22元。
練馬師蘇偉賢近排成績唔及早前咁搶鏡，呢次「特獎」幫佢重響勝鼓可謂及時雨，須知此廐「發盈喜」周六（4日）晚列陣杜拜超級星期六賽馬日，力爭好成績出線跑杜拜世界盃日大賽，「特獎」今場開齋，多少有種提升士氣的作用。
蘇偉賢今晚賽後將啟程前往杜拜，為「發盈喜」遠征做好準備，「特獎」贏馬正好壯行色。蘇偉賢說：「『特獎』的惰性很重，非常懶惰，我從未訓練過一匹馬好似『特獎』般，需要騎師由頭騎到尾。前仗牠塞死冇位上，今場初落五班有利，牠跑1800米或以上均合，希望這匹北半球馬在港開齋後續有好表現。」
與此同時，潘頓近排復蘇已連續三個賽日有馬贏，呢次亦係佢季內首度騎蘇偉賢賽駒勝出泥地賽事。
頭場全冷門兼重磅馬天下，二至四名順序為「糖黐豆」、「幸運神駒」及「幸運贏贏」，四重彩派55萬幾；反觀大熱門由雷神首策的「活潑飛揚」（告達理馬房），跑落虎頭蛇尾，拉士徹底力竭只得第12名。