這晚（1日）沙田泥地夜賽頭兩場，都由1號掛頭牌馬建功，連贏都係搭番重磅細冧巴馬，但第三場四班1200米卻來個反底，由一對輕磅大冧巴馬構成連贏。
當中徐雨石馬房10號馬「嶺喜峯」後上擊敗12號馬「飛躍成功」爆冷掄元。「嶺喜峯」排12檔一起步見習騎師黃皓楠即力策，沿途前置，最終以半馬位佔先建功，造就黃皓楠傷癒復出後首次贏馬，亦帶挈佢師傅徐雨石延續今季泥地王本色，單Win及組合獨贏A3分別派213及27.5元，獨贏21倍更著了啡燈。
現年23歲的黃皓楠季初於谷草夜馬騎「飛皇騰達」（已退役）墮馬受傷，之後唞足三個月，直到上月26日至恢復出賽。經過若干場賽事熱身重拾作戰狀態後，黃皓楠今場騎冷馬「嶺喜峯」交足功課，直路出盡九牛二虎之力，鬥贏韋達座騎「飛躍成功」勝出，亦是他自去年10月30日勝出「太陽旺旺」後，足足4個月來首捷。「嶺喜峯」季內第二次取勝兼首度贏泥地，四歲馬有大熟大勇之勢。
徐雨石早前去了澳洲馬匹拍賣會揀蟀，這晚回港親自督戰即有頭馬進賬。徐雨石說：「希望黃皓楠贏了這場後，可以增強他的自信心。此馬今仗賽前休息了一段時間，馬兒去年12月曾在泥地試閘取勝，今場跑泥地有新鮮感， 加上有減磅，遂成功偷襲。」
第三場二至四名順序為「飛躍成功」、大熱門「追風追月」及「智愛」，四重彩派九萬四千幾。