做兵嘅方法有好多種，其中一種係走去守住歷史。香港歷史博物館用咗兩年時間籌備，今日起（3月2日）舉行香港玩具傳奇展覽，搵齊2,600幾件古今中外嘅玩具大晒冷。最吸睛當然係由樓梯排到上門口嘅白兵，足足有100隻，白兵心口有粒掣，㩒咗仲會發聲㖭。
今次展覽按玩具歷史、本地玩具業發展同潮流分咗主題館，門口仲有好多真玩具等大家自由發揮。唔好以為玩具係細路先啱玩，歷史博物館館長張銳森話，今次除咗畀大家緬懷童年，都想市民認識玩具發展史同社會轉變嘅關係。
2,600多件玩具晒冷
佢話例如煮飯仔就係早年社會縮影，因為好多小朋友都要幫忙湊細佬妹、煮飯洗衫。另外香港玩具唔少係本地工業家嘅傑作，好似議員蔣麗芸嘅爸爸蔣震，1959年獨創咗一部可以噴到紅白兩色嘅機器製造塑膠料，發明咗西瓜波惠及廣大兒童。其他展品仲有近代嘅美國隊長、麥兜故事、遠少少嘅小露寶、摺「東南西北」，甚至1910年代公仔紙都一應俱全，相信無論邊個年代出世，入去一定可以喺2,600多件玩具中搵到屬於自己嗰代嘅童年回憶。展期即日至5月15日，入場費10蚊。
李八方
