自從伊巴謙莫域（圖）離開巴塞之後，每年都有人話佢養老㗎嘞，但佢就一年又一年擊碎「養老論」。由30歲到35歲，佢嘅入球數字都冇點跌過。對曼聯嚟講，伊巴並唔係另一個拿臣，佢仲似另一個尹佩斯，係一個即插即用嘅世界級射手。
仲記得伊巴謙莫域喺巴塞隆拿過得唔如意，之後去咗AC米蘭，唔少人都覺得伊巴嘅職業生涯將走下坡，因為嗰陣AC係出名嘅老人院，專收啲跌watt舊電池，好似朗拿甸奴、羅賓奴之類，而伊巴可能係其中一嚿。11/12球季，伊巴30歲，佢幫AC入咗35球，之後去咗巴黎聖日耳門。離開四大聯賽，睇嚟伊巴都係自暴自棄，趁臨退休幾年搵到盡，點知踢咗四季，每季入波至少都有30球，上季34歲嗰陣仲有50球咁多。呢季嚟曼聯，季前好多人包括小弟在內，都好擔心，覺得伊巴臨老先去英超，點頂得順英超啲節奏！點知，啪啪……伊巴26個入波省埋嚟，真係省到小弟一地眼鏡碎。
仲諗住伊巴喺英超應該冇90分鐘體能，點知佢踢親正選都唔使早啲唞，踢到8、90分鐘都仲有貨賣。伊巴今季各項賽事幫曼聯入26球，但42%嘅11球喺比賽75分鐘或之後先入，代表伊巴越到尾段越強大，真係估你唔到！伊巴後勁咁強，家陣有15個聯賽入波嘅佢，會唔會靠後勁做到英超神射手呢？喺伊巴嘅世界，真係話唔埋。
文：咖喱