如果大家睇嘢眼矇矇，戴番副眼鏡就搞得掂，馬匹都有「眼鏡」可戴，嗰啲就係所謂眼罩！有啲馬戴咗之後跑起嚟會集中啲，唔使東張西望。不過以前嘅眼罩色調就好寡，唔係全黑，就係全藍，或許全紅。
不過時至今日，眼罩由款式到色澤都變咗好多，已成為馬匹潮物。有啲馬嘅眼罩，仲設計到同自己件綵衣差唔多。唔單止出賽時好搶鏡，若果贏咗馬，影頭馬相就更加醒神啦。有啲馬戴咗個新潮眼罩，就會好似「多啦A夢」啲法寶咁神奇，忽然會變到識贏。
唔係呃你，絕對有事實根據，好似「一定賺」戴舊款眼罩搏極都係得第二、三，但一改戴全藍色有個「一定」字眼嘅新眼罩，就好似爆Seed咁，直落連贏三場。
仲有匹「快趣的」，之前17場未贏過，前仗更出閘後拋跌騎師韋達，點知再出換上一個有個「快」字嘅黃眼罩，就由頭放到尾開齋，你都咪話呢啲眼罩唔神奇。
其實早在兩三季前，「友瑩」系馬主楊毅已開創先河，率先為名下前短途馬王「友瑩格」，設計中間有個「格」字嘅粉紅眼罩。
直到明星馬「巴基之星」，今季戴咗個印有馬主簡寫名字KD及白星圖案，同綵衣一套嘅眼罩後，就將呢個新潮流推上更高峰，令到唔少馬主都爭相仿傚。就好似馬主郭少明嘅「美麗」系同「加州」系嘅「加州再豫」等，最近都換咗個靚眼罩，成績即時提升咗唔少。
如果你係馬主想快啲贏馬，不妨落啲心機幫愛駒，設計一個得意又與別不同嘅眼罩，話唔定下次贏馬就係你。