英超冠軍都基本大局已定，你唔係同我講咁穩陣嘅車路士，會揸住雙位數積分優勢會崩潰呀？相反神射手都叫做有得爭吓，難得足智彩又有開盤，𠵱家有三位球員入咗17球並列榜首，以近況論最銳當然係哈利卡尼（圖）。
熱刺前鋒卡尼又真係勇，繼英足盃對富咸後，又對史篤城嘅聯賽連中三元。其實23歲仔嘅卡尼，有別於以往英格蘭柱躉式前鋒，接應兩翼傳中頭槌攻門都唔差，不過最煞食係控球能力強、轉身快，往往同隊友一輪組織後入楔，而且佢嘅遠射都唔差，算係全面嘅射手。
講真，熱刺雖然同英超冠軍無緣，但領隊普捷天奴對年輕球員嘅信任，真係英超前列球隊最高，除咗卡尼，迪利阿里、哈利雲克斯等都係上位嘅新星。年輕人好處係順境嗰陣真係可以遇神殺神，但遇上挫折，往往唔夠EQ去振作，不過暫時保持呢個勢，熱刺今季保前四都應該幾穩陣。
不過熱刺嘅球員賣買就真係令人擔心，過去打起嘅莫迪歷、加里夫巴利，都以高價賣畀皇馬，但熱刺就買批次貨番嚟，又要領隊大換血。仲有熱刺嘅球會規模唔係最頂尖，球會有10萬鎊周薪薪酬上限，今季初就因為滿足唔到沙迪奧文尼要求，搞到文尼最終選擇加盟利物浦，如果熱刺今季多埋文尼，真係攻力強到難以想像。坦白講，英超球星拎10萬鎊就真係少，如果熱刺唔放寬薪酬架構制度，真係只會趕卡尼去皇馬。
文：牽牛