家陣要打護級戰嘅上季英超冠軍李斯特城，前晚喺英超主場爆冷贏利物浦3:1，取得今年首場英超勝仗，可能有人會覺得佢哋喺炒咗領隊雲尼亞里後終於踢番場爭氣波，但若然近日有睇花邊新聞，就覺得班球員好可疑，係咪之前特登hea踢逼走雲帥，等佢執包袱後就即刻露出「狐狸」尾巴，回復冠軍球隊本色。
李城上季喺英超神奇奪冠，但今季就跌晒watt，仲搞到要打護級戰；而上周三佢哋喺歐聯16強首回合作客輸畀西維爾1:2，領隊雲尼亞里第二日就俾李城兜咗，之後有傳係班球員包括占美華迪（華Dee）同卡斯柏舒米高等玩嘢，令雲尼亞里冇咗份工。
嫌疑人華Dee起孖破利記
前晚李城迎戰利物浦，由於賽前九場不勝兼輸咗當中七場，由助教基治沙士比亞暫時領軍，所以莊家同外界都唔睇好佢哋；點知落到場又變番上季嗰隻神奇「狐狸」，踢咗60分鐘就靠華Dee梅開二度同埋真禾特入一粒而領先3:0。利物浦喺68分鐘雖然由菲臘比古天奴追番一球，不過李城最終都係贏3:1。
李城贏波後以26戰得24分升上第15位，輸波嘅利物浦就26戰得49分繼續排第五位，比第六位嘅曼聯多一分但打多一場。李城臨時領隊基治沙士比亞賽後豪言話會方唔使搵新帥：「我有冇能力坐正教李城？梗係有啦！但決定權始終係班主度。」
李城球迷力撐雲尼亞里
雲尼亞里走咗之後李城即刻由蟲變龍，家陣喺電視台講波嘅利物浦名宿加歷查忍唔住寸佢哋之前hea踢，搞死雲尼亞里：「李城踢得好好，但佢哋贏波同戰術冇關，而係佢哋對贏波充滿渴求，仲個個都表現得龍精虎猛。我哋見到一支全心全意比賽嘅球隊囉。」其實，李城班球迷都好撐雲尼亞里，除咗戴雲尼亞里面罩同拉起支持同多謝佢嘅橫額之外，當比賽去到65分鐘嘅時候，齊齊開手機閃光燈，以示尊重現年65歲嘅雲尼亞里。
利物浦周六會喺主場鬥阿仙奴，如果再有差池，前四隨時唔使諗。佢哋嘅領隊高路普表示：「由呢一刻開始我哋要更加認真，全部人都要為前途而戰，包括我在內。呢場波我哋由頭到尾都踢得好差，踢到咁唔可以怪任何人，只能怪自己，唔可以搵藉口，我哋要承擔責任。」另外，今場因傷冇落場嘅隊長佐敦軒達臣，可能下場連對阿仙奴都打唔到。高路普話：「佐敦軒達臣喺練習時整傷腳，雖然冇骨折，但唔知幾時先可以好番，可能趕唔切喺周六落場鬥阿仙奴。」
