香港寬頻（1310）人才及財務總裁黎汝傑（阿Ni）2004年加入香港寬頻，做咗13年，除咗計數同請人叻之外，估唔到連營運都搞得掂。公司噚日宣佈，阿Ni即日做埋營運總裁（COO），同時繼續睇財務、法律及人才相關事務，一人兼三職，認真厲害。升職後阿Ni將向行政總裁及持股管理人楊主光（威哥）直接匯報。
從商其實並唔係阿Ni嘅夢想，年少時佢想做「網球王子」，職業網球選手，但覺得自己缺乏運動天賦先至轉戰商界。
阿Ni喺商場上相當成功呀，舊年佢就俾FinanceAsia選為「Best CFO in Hong Kong」，2009年亦拎過人力資源管理獎（HRM Awards）頒發嘅「Champion of Human Resources」獎項，唔知今次做埋營運總裁有冇獎呢?不過最緊要係有人工加啫。