得嗰4個月任期，財政司司長陳茂波都要豪裝官邸，乜司長官邸真係咁多問題？曾經住過政務司司長（CS）官邸嘅林鄭月娥喺商台節目話，若非必須改動，應等任期有幾年嘅官員作修改決定，自爆當年入住時做過好小量工程，但查實浴室個花灑唔多掂，「有時好慢一條線，有時好大……有時熱到沖唔到，有時就係凍水」，似乎沖唔到個靚涼，但佢話都係「算數」，希望官邸喺長時間冇人住時先維修。
原來林鄭當時做過嘅小量工程包括增建一條石板路仔，指過去招待賓客時發現門外花園全是草地，着住高踭鞋嘅女士有時踩落草地成腳都係泥，入屋又會整污糟啲地毯，所以鋪咗條石板路。而佢自爆個花灑唔掂之後，主持人陳志雲笑住問：「但你知嗰度有廁紙？」林鄭尷尬回應：「嗰度有廁紙！」
若然當選會唔會入住禮賓府，林鄭表明梗係會，「唔係住邊度？」稱自己置業有困難，「我一筆過長俸，喺灣仔買唔到300呎」，話完全明白置業困難影響年輕人，佢話唔算太熟悉禮賓府，過去都只係去過招呼應酬，「出面好似有種嘢，但我唔係好識種嘢」。
咁會唔會要求風水師為禮賓府睇風水，林鄭話相信咁多年嚟睇過晒，透露有次玄學大師蔡伯勵去CS官邸探訪，「佢話『我睇過晒（政府官邸風水），你呢度風水好好』」。
老公變咗公眾人物好慘
佢話囝囝唔喺香港，唔會搬入禮賓府；至於丈夫林兆波會否陪同遷入，佢冇回應，只稱丈夫一直在港，「不過佢好少蒲頭，一蒲咗好慘，佢話變咗公眾人物」，透露有市民喺灣仔星街拉住老公問佢係咪林鄭老公？有人就話多謝佢咁支持老婆。
李八方