強積金推行超過16年，投資表現一直為人所詬病，積金局主席黃友嘉（David）噚日同傳媒飯局時就為強積金大平反，本身係老闆嘅佢原來一直有為自己供強積金，自爆𠵱家強積金資產中逾三成係投資回報，投資回報高達44%，戰績彪炳，羨煞旁人。
八方一眾行家自然對佢嘅投資策略大感興趣，David透露佢嘅強積金全數投資股票基金，而且主要係藍籌港股，其間雖然有波幅，但趨勢係上升，所以總算有斬獲。David話，強積金係長遠投資，加上佢都有做其他投資，所以強積金就集中買股票，算係分散投資，其他人應該因應本身情況決定投資組合。
佢嘅兩年積金局主席任期3月中屆滿，大家都估佢會冧莊，八方建議政府大可以David做生招牌，宣傳強積金。