市民查詢銀行服務，通常用電話渠道，不過駁通之前，都要等呀等，又要㩒好多個數目字，等到有人接聽已經谷到成肚氣，火都嚟。
渣打香港近排就推出一個有趣服務，一去佢個網頁，右下角有個藍色長方格仔，可以選擇文字、聲音或視像直接同客戶服務員聯絡，比起一般電話客服好嘅係唔需要等好耐，唔係渣打客戶都用得，平日朝9晚7、周六至下午2點有人回應。
華華走去查詢人仔定存息率，一位名為Sherry Wang嘅客服過咗1、2分鐘就回覆，Sherry話自己係真人，唔係機械人，除咗用英文，用中文問佢都得。
渣打IT總監溫敬道（Paul）話，呢個服務最近推出，只答常見問題（FAQ），牽涉交易或個人資料嘅就要去分行。渣打為呢個服務，請多咗人去處理，家陣屬試行性質，將會逐步提升質素。展望未來，Paul估計部份分行服務可以用互聯網取代，長遠成本會降低。如果將來聊天機械人（Chatbot）研發成功，FAQ都可以由機械人代答。不過到時會唔會好多人失業呢？