周日維拉利爾主場2:3輸畀皇家馬德里，「黃潛」維拉利爾主席路治發爛渣，話見到球證文沙路賽後拎住一個皇馬嘅膠袋走，暗指皇馬送禮畀球證。不過原來黃潛都有送禮㗎。《馬卡報》報道，西甲球會慣常喺賽後送紀念品畀球證，其中皇馬好闊綽，除咗原子筆、鎖匙扣之類，有時仲會送波衫；至於黃潛就送陶瓷擺設，但希杭唔知係有性格定窮到燶，冇送嘢畀球證。