早前有個論壇嘅嘉賓組合，都幾令人耳目一新，就係電盈嘅李澤楷小小超拍住姚明，同場分享創業心得，撮合佢哋嘅「紅娘」係身兼演藝小組選委嘅香港青聯主席吳傑莊（Johnny），42歲嘅佢都喺創業路拼搏，高中時因《大時代》而夢想成為上市公司主席。
讀書已經鋤弟跑馬仔
幼時住渡船街板間房、3歲遷入大興邨嘅Johnny，中學已識得民建聯張國鈞，大家都喺東華三院邱子田紀念中學讀書，中四更坐正隔籬，但佢話讀書冇張國鈞咁叻，成績只係中間偏後，但一樣鍾意打籃球，「不過佢係運動健將，我就係肥仔咁啦，哈哈」。
懶讀書嘅佢憶述，當時鍾意約埋同學鋤大弟、打麻雀同跑馬仔，「有時都有啲斬獲㗎」。雖然會考前未有發奮，但喺數理電腦等科目有3科B，皆因呢啲科目唔使特別讀。
佢1996年入咗理大讀製造工程，首年已經考到全班第一兼攞獎學金，之後喺理大讀博士學位嘅最後一年，同幾個朋友開始創業。佢自爆入大學前嘅夢想係做上市公司主席：「嗰時好鍾意睇《大時代》，覺得丁蟹炒嚟炒去（股票），好有型。」佢仲話當年試過重到180磅，入U前積極「地獄式」減至130磅。