周日曼聯同修咸頓喺溫布萊球場上演嘅英聯盃決賽，今季先加盟嘅領隊摩連奴同前鋒伊巴謙莫域果然有料到，特別係伊巴上下半場各建一功，以3:2擊敗「聖人」，取得加盟後首個具競爭性盃賽，伊巴賽後仲風騷咁講，曼聯簽得佢就預咗有盃捧啦。
雖然呢場波已經塵埃落定，不過都仲有爭議性場面；上半場僅11分鐘聖人前鋒加比亞甸尼門前建功，不過就俾旁證枉判越位在先，入球無效；曼聯大難不死仲喺八分鐘後先開紀錄，伊巴主射罰球彎過人牆入網，曼聯領先1:0。紅魔鬼季初以2:1贏李斯特城拎到社區盾，都係靠伊巴同連格入波，點知呢場波幫曼聯入波都係呢兩個人，連格喺38分鐘禁區頂冷靜射入地波，曼聯領先2:0。
伊巴個人第32個獎盃
其實修咸頓都唔係全場捱打，加比亞甸尼完半場前建功，今次冇食詐糊，幫聖人破蛋。換邊後呢位意大利前鋒更加美妙咁轉身快射，追成2:2平手，如果唔係中場奧里奧爾羅美奧喺63分鐘的頭槌攻門中柱彈出，更有機會反cup。大難不死嘅曼聯果然有後福，87分鐘伊巴接應安達靴里拉傳中頂入，個人梅開二度之餘，亦幫曼聯以3:2贏到呢場決賽；曼聯隊長朗尼雖然冇落場，不過捧盃者都仲係佢，真係最舒服嘅隊長嘞。35歲嘅伊巴已經累積個人第32個獎盃，賽後訪問仲寸隊友保羅普巴，話佢唔係曼聯買番嚟，只係免費加盟；伊巴之後仲大口氣咁講：「曼聯簽得我，都預咗有冠軍落袋啦。」咁又真係抵佢寸，事關由01年阿積士成名開始，效力每間球會都拎到錦標。
曼聯44冠同紅軍睇齊
不過曼聯捧盃都真係多得旁證誤判，有網民直頭將曼聯會章改為旁證㖭，而修咸頓名宿拿鐵斯更直斥球證判決嘔心。點都好，曼聯已累積球會第44冠，雖然唔同人有唔同計法，好似有啲唔計世冠盃前身豐田盃等，但點扣都有41冠，同利物浦睇齊，利物浦官方Twitter亦都刪除「英格蘭最成功球會」呢句。
