昨天分析胡官入閘對薯片的影響，有讀者不解文末何以含糊其詞，說「林鄭雖敗象初現，薯片仍危機四伏」──按常理奶媽走勢轉弱，薯片不就股價上揚嗎？這本來是對的，問題是泛民基金野心太大，還乘勝追入一種叫「胡官」的衍生工具，加大市場波動，可能扭轉奶媽弱勢、壓抑薯片升浪。股神葉天說「股市係人嘅遊戲」，政壇亦然，欲知後市如何，除了聽消息，也不妨代入角色，模擬選委思路。以下所述，是我作為騎牆派選委（即主流建制派選委）對奶媽股「2.0」的觀感：
2.0從邊個角度睇，都係隻老千股。呢間公司舊年口口聲聲話唔上市，甚至摺埋佢，但689除牌後，一個屈尾十就畀人用嚟「借殼上市」，莊家自己先炒熱佢，再搵班財演引基金同散戶落搭。我有啲基金佬friend唔買，就畀佢哋話「惡意沽空」，同中央為敵，搞到大家無奈入貨，短短五十日就夾到隻垃圾股上歷史高位，真係人唔笑狗都吠。睇番基本因素，管理層日日認屎認屁，但業績根本無料到，「佔中」、「鉛水」、「故宮」個個project都拖低政府聲望。現價係就係高企，但衰在期貨大幅低水，表現亦冇財演吹得咁勁，說好的700提名呢？
仲有呀，以往三屆特首，邊個上馬時民望會低到佢咁陰公㗎？望之不似人君。呢隻垃圾股，依家升到你唔信，但一轉勢，畀奶媽拎去當廁紙用就差唔多。講到咁，你以為我唔會提名佢？儍架你，我點敢呀？睇吓《成報》，畀黑社會搞呀！黑社會也有愛國的，對不對？我咁精，唔止一早提名佢，仲公開同佢攬頭攬頸，差在未法式接吻咋，橫掂我私下已經同鬍鬚仔講：暗票畀你。但你唔好問我最後投邊個，「雖有智慧，不如乘勢」，三個星期後個勢，sorry我未睇到。不過咁，只要2.0有少少唔對路，我都好樂意雪中送屎，屈我上車屈得咁爽吖嗱？