【尋找首爾的香港】之前介紹過喺韓國打拼咗20年嘅香港人River，由導遊轉行做烘焙師嘅故事。今次River想介紹一位佢認識咗20年嘅韓國朋友Billy，特別之處係呢位韓國人操得一口流利廣東話！
20年前，River喺韓國做導遊帶香港團，當時嘅跟團攝影師就係Billy，兩人因而相識。Billy話做咗攝影師17年，因為跟香港團而成日聽到廣東話，最快學識嘅當然係粗口，佢話：「仆Ｘ！冚ＸＸ！呢啲係客人成日講，所以我就問客人係咩意思呀。」除咗跟客人學，Billy亦都有自學，「無學校教廣東話，所以我睇戲，我最鍾意係Andy Lau，睇佢喺《天若有情》揸電單車好型！」
Billy嚟過香港超過20次，話多數都係去尖沙嘴買嘢，尤其牛仔褲好平，最鍾意食嘅唔係點心，係牛腩麵！Billy唔止因為工作、旅行同香港結緣，仲有戀情，佢自爆同過香港女仔拍拖，可惜唔work，「香港女人好強呀！所以我驚呀，無辦法！」
「欺騙大家有何難 我要好過...」坐上Billy嘅車，會傳嚟廣東歌，原來近兩年Billy少咗接觸廣東話，轉行做老闆開中式餐廳，但係佢唔想忘記廣東話，「如果唔係成日聽到廣東話，或者傾偈講得多，我驚會忘記晒，所以揸車嘅時候特登播廣東歌。」
兩年前，Billy喺首爾麻蒲區開中式餐廳，除咗有港式小炒、炭爐燒，仲有特大中式串燒爐。Billy話串燒爐嘅idea係嚟自中國，自己用咗折合約港幣20萬研發，雖然過程失敗五次，但今日呢個爐已經成功向韓國政府取得專利。Billy坦言o依家仲未返本，希望今年生意會好。
Billy話喺做生意方面，覺得香港人好叻，以前自己認為只有一條路可行，但River就會話畀佢聽轉下彎又有第二條路，所以佢好珍惜River畀嘅意見，「好多人入嚟食嘢，話好食呀好食呀，但以後唔嚟，River係真正嘅朋友，會同我講呢個菜式唔掂，呢個好食，呢個改少少，咁先係好朋友！」River直言韓國人諗嘢好固執，「我哋識咗Billy咁多年好明白，咪用我哋嘅辦法囉！好似叫佢煮咕嚕肉加菠蘿，佢唔加，我就直接買兩罐菠蘿畀你，逼你加！」River話可能人哋會覺得佢傻，「有人話人哋生意好唔好關我咩事，但佢係我朋友，我自然就想佢生意好！」
呢份港韓真‧友誼儲咗20年，River睇住Billy由男仔變成男人！River話：「韓國人未當兵叫男仔(남자)，當完兵就變男人(대남자)，就好似一個成人禮。」所以當年Billy要入伍，River就同成班香港朋友一齊送佢去軍營，「我哋住首爾，就由首爾揸車去軍營，途中每度停下，玩三日兩夜。」一行約十人盡情玩，盡情笑，盡情飲，「飲到Billy醉醉地，就揼佢喺軍營門口，真係事實嚟o架！佢瞓醒就要接受現實，攞住自己啲嘢入軍營啦！」講到呢度，Billy拍一拍River嘅膊頭，講咗句「Thankyou下！」呢份友誼，喺韓國人心目中先稱得上「朋友(친구)」兩個字！
민꼬치(敏圓筒羊肉串專門店)
電話：010-8704-6388
地址：서울특별시 마포구 월드컵로 149 2층
(首爾特別市麻蒲區世界盃路149二樓)
facebook： http://bit.ly/2m6gFW6
記者：鄒倩婷（阿仙）
攝影：陳家文、李錦鏵
剪接：Roy