鄧紫棋（G.E.M.）前晚離奇現身黎明和林建岳合辦、在中環海濱舉行的Dragonland Music Festival，於壓軸出場的美國樂隊Black Eyed Peas演唱時，G.E.M.忽然現身舞台，現場樂迷即時大喝倒采，明顯聽到噓聲的G.E.M.即臉色一沉，完騷後在Instagram貼文，指自己是獲成員will.i.am邀請，才會由觀眾變嘉賓，不少人則在Ig留言「點解會有宇宙G.E.M.」、「點解佢要破壞美好嘅一晚」。
工作人員阻止
據知主辦單位對G.E.M.出現極度不滿，有人爆料說：「G.E.M.企喺台邊準備出場，工作人員阻止兼唔肯俾咪佢，之後Black Eyed Peas經理人即快手喺工作人員手上拎咗支咪，G.E.M.再由對方手上極速擸咪，急步走咗上台，拉都拉唔住。」
昨日《蘋果》聯絡主辦單位發言人王凱文，他直認完全不知道G.E.M.會出現。他說：「完騷後收到好多電話問點解會有佢（G.E.M.），大家都嚇咗一跳。」G.E.M.出場時是否被阻止？王凱文說：「我趕去後台想了解，佢已經上咗台，工作人員有疑問，阻止都係好正常，因為嘉賓名單的確係冇佢。」
而G.E.M.接受本報訪問時則謂：「我text阿will（will.i.am）同佢講good show，佢知道我去，就叫我不如上台同佢唱『Where is the love』，跟住佢就即刻send歌詞俾我話係呀！於是我就去咗呢個即興嘅表演喇！」
「成個下午練歌」
G.E.M.又說：「事前冇人知㗎，用咗成個下午背歌詞同練歌，只係得will同佢經理人知呢件事。」有傳工作人員不許她上台？G.E.M.說：「其實係will個manager去咗panel同佢哋講我會上台一齊唱，佢哋就俾咗支咪我喇！」另外，前晚入場睇騷的藝人有李施嬅、蔡思貝及鄭融等。
採訪：小米、皓騫
攝影：陳俊強