噚日最高興嘅，除咗係薯片同胡官嘅支持者，應該仲有長和（001）蟹民，就連長和大班霍建寧都鬆綁呀。
大家應該仲記得，霍建寧舊年8月入市增持長和100萬股，平均價95.37元，講緊9,537萬元。霍大班都買，自然吸引唔少股民跟進喇，長和亦好生性，曾變紅底股，可惜好景不常，長和之後跟大市跌，舊年底見過88元，霍大班呢批股票賬面蒸發7球。
多得大行唱好，長和噚日爆升2%，收報96.3元，即係話呢，霍大班都唔使做蟹民了。
不過講就係咁講，華華當然知道霍大班坐貨能力強喇，佢目前揸住511萬股長和，市值接近5億元，佢之前揸住嘅長和股票應該平價買入，只係一批買貴咗都冇乜所謂喇。