北京兩會下月初揭幕，工聯會有兩位港區人大代表包括鄭耀棠同吳秋北，全國政協委員就有陳婉嫻同林淑儀。佢哋今年嘅5個提案及社情民意建議多係前線辦事處收到嘅求助個案，包括建議檢討單程證審批制度。
促轉機證件統一標準
身為會長嘅林淑儀話如果在港申請人喺申請過程中有變故，如坐監或過身，公安機關或會停止處理有關審批，結果出現嘅情況可能係小朋友已來港，但丈夫申請太太來港時過身，咁個小朋友就冇人照顧，所以促請公安機關只要申請時符合條件，即使中途有變故都會繼續批出單程證，目的係家庭團聚嘅人道理由。
佢哋仲建議內地出入境管理局公佈一套適用於全國所有機場嘅轉機證件標準，指收過投訴關於北京同上海機場轉機證件標準不一，北京只須出示護照，上海就要有回鄉證，為免混亂不如劃一處理。