今日係楊穎（Angelababy）28歲生日，佢老公黃曉明原本喺橫店開工拍緊《琅琊榜之風起長林》，但為咗幫老婆慶祝，又同劇組請假嚟香港，噚晚約7點左右，曉明、Baby同朋友現身灣仔君悅酒店，幾位女工作人員拎咗兩盒蛋糕，又拎住幾袋嘢做準備。
大約7點25分身穿黑色西裝嘅曉明，俾4位工作人員包圍，當中有工作人員小心翼翼拎住一套白色西裝，之後Baby經理人Kim同曉明契媽向華強太太陳嵐等到場。
搵人守門口
Baby嘅生日會喺君悅酒店泳池旁嘅一間玻璃房舉行，下午4點半左右，已經有數十人喺玻璃房佈置，場內放咗一張長餐桌，又有好多花嘅擺設同大螢幕，估計到時會播片，大約8至10位操普通話嘅後生仔，討論晚上活動安排、大約嘅影相時間、影相位等，不過現場間房唔算太大，相信係低調同友人食飯。不過發現記者後，即刻搵人封黑布，又有人守住玻璃房門外，似乎唔想受到打擾。
上月17號生咗囝囝「小海綿」後嘅Baby，一直喺香港坐月，老公就飛去內地拍劇，聽講曉明都唔捨得老婆同囝囝，但為咗工作都冇辦法，但今日係老婆生日，所以噚日同今日都要留喺香港陪Baby兩母子。
撰文：馮仁昭