滙豐贊助七人欖球賽聽得多，噚日佢哋就喺灣仔宣佈夥拍教大同欖球總會培訓體育教師，等佢哋教識小學生打欖球技巧，滙豐亞太區零售一哥麥浩宏（Kevin Martin）現場都露咗兩手傳波技巧，睇嚟後生嘅時候都撞得吓。
Kevin應該冇打欖球一段日子，不過佢話有同囝囝一齊睇波，話希望透過培訓計劃令香港欖球運動茁壯成長，可以打到去奧運會，仲希望香港有日可以拎世界冠軍㖭。
不過小學生一般唔多健壯，打欖球會唔會好容易粉身碎骨㗎？七人欖球代表隊隊員李卡度（Cado）同華蓮絲（Linsay Varty）就試範教小學生，原來佢哋玩嘅係非撞式欖球（touch rugby），掂到對方就算輸，喺籃球場就玩得，咁就好多學校都參與到。
Cado又話，外國啲細路仔小學三年班已經學打欖球，小五已經參加公開比賽，希望家陣多咗教學資源後，更多香港人參與同認識呢項運動喇。