雖然特首選舉提名期聽日先至結束，但形勢大致已定，選委以提名將曾俊華、林鄭月娥同胡國興送入閘，形成選戰「嬲」字決，話明要作戰到最後一刻嘅新民黨葉劉淑儀，料喺唔夠提名下望閘興嘆，繼上屆2012年選戰後再度失望而回。唔少政界中人都話葉劉其實喺一眾參選人中最奮力作戰，有政界嘆指佢可能係被中央所「害」。
建制選委讚好過林鄭
睇番呢場選戰，葉劉其實最早表態會去選，甚至連立法會主席嘅寶座都唔要，決心之大可見一斑。而綜合唔少建制派界別選委意見，雖然葉劉出線機會好低，但準備工夫卻好足，據知多場閉門會面都獲讚表現最好，對政策熟悉兼表達得好，甚至好過林鄭月娥，至於曾俊華就一如所料有啲唔多熟書咁囉。
好可惜中央硬撐林鄭，建制派選委都唔敢畀提名葉劉，以免佢入閘後對林鄭構成競爭。有建制中人就為葉劉不值，話令到葉劉落如此慘況，最衰都係中央。點解又關中央事？又同23條有關！
呢位政界人士話喎，自從葉劉喺2003年因為23條立法下台後，唔知係咪都有啲補償心態，中央對喺美國留學後返港嘅佢寵信有加，除咗大舉支持佢喺港島立法會直選，葉劉其後訪京，次次都獲得高規格接待，聽聞甚至會有要員去佢下榻嘅酒店拜訪，受到中央高度信任，料因此令佢唔理中央放風挺林鄭，堅信自己都係中央可以接受嘅特首人選，邊個估到中央最終連閘都唔畀佢入，咁仲唔算「愛佢變成害佢」？
雖則葉劉再度無法成為特首候選人，但佢今次嘅選戰表現卻深入民心，至少有兩幕經典場面，都深深烙印喺市民嘅腦海，試過不忿梁振英只係讚林鄭有擔當而哽咽，令唔少人「我見猶憐」，亦曾應主持人要求抬腳上枱以示識得襯衫，實行軟銷。八方覺得市民查實應該多謝葉劉，若果冇佢咁拼搏使出渾身解數，呢場跑馬仔選戰可觀性肯定大減，點有咁多機會食花生？
李八方
