遵理學校最新公佈，與麥明詩前男友（現任男友？）林作，簽十年全職合約教英文，兼任海外升學顧問。
林作接受本報查詢時，就話今次係經朋友介紹之下，就同遵理傾合作，雙方一拍即合，傾咗幾個月之後，終於喺今日公佈大計，「我見到佢哋個藍圖，成個計劃，我加入唔係只係教書咁簡單。」被問到點解會肯簽十年，佢話：「坦白講我哋係有野心嘅，我哋係想做到好大，我對佢哋係幾有信心。」至於點樣大法，佢就話要問返遵理。
林作近期就主動放棄執業大律師資格，佢話，今次同遵理嘅合作，係令佢肯放棄執業嘅原因之一，而佢一向都想喺各方面發展。事實上，林作首部處男電影《江湖三傻》，今日喺鯉魚門進行開鏡儀式。
佢就話，喺遵理主要係教國際英語水平測試（IELTS）班，同埋提供升學建議。被問到佢本身識唔識教書，佢就話，「我以前教過啲散Job，尤其英文我在行，我相信佢哋覺得，我特質適合做呢樣嘢，所以一拍即合。」
至於幾時開始教，佢就話未有確實日期，但將會喺短時間內開班。收費方面，佢就話係由遵理決定。
林作中學讀英國哈羅公學，之後喺英國牛津大學數學系畢業，其後於倫敦法律學院法律文憑，副修哲學，2013年返香港讀香港大學法學碩士。