曼聯贏3:2封王，那邊廂周日西甲皇家馬德里一樣係贏3:2，但過程就驚險得多，作客維拉利爾一度落後兩球下大逆轉，連入三球反勝3:2。基斯坦奴朗拿度（C朗）今場波射入12碼扳平，仲令佢成為西甲12碼王。
維拉利爾迎戰皇馬，半場互無紀錄，易邊後突然入球大爆發。主隊嘅文奴捷古路斯同巴卡保各入一球領先2:0，但皇馬喺64分鐘展開大反擊，傷癒後首次正選嘅加里夫巴利先破蛋，之後到74分鐘中場般奴蘇利安奴喺禁區犯手球，12碼由C朗操刀搞掂，呢個亦係C朗喺西甲歷來第57個12碼入球，超越皇馬名將山齊士刷新紀錄。加上後備入替嘅艾華路莫拉達喺83分鐘頭槌破網絕殺，反勝3:2。
美斯絕殺食馬體
周日另一場西甲，巴塞隆拿作客馬德里體育會一度被逼和下，靠美斯喺完場前入波贏2:1。皇馬巴塞齊齊贏波，加上西維爾喺上周六亦全取三分，今輪西甲榜首三強形勢不變。
