禮賓府將於3月5日舉行開放日，同舊年年尾嗰次開放日相同，今次開放日會安排香港警察樂隊同學生樂團喺禮賓府花園表演，遊覽路線沿途亦會放置二維條碼及展板，介紹禮賓府嘅歷史、建築特色同珍貴時刻，上次開放日特首梁振英仲未宣佈唔連任，佢就有同參觀嘅市民見面，但𠵱家佢唔使爭連任，仲見唔見市民就真係難講。
上次禮賓府開放日，梁特同佢太太梁唐青儀係朝早現身花園，除咗同部份參觀市民傾偈閒談，又同小朋友合照，當時好多記者追問親民現身係咪為爭連任提升民望，梁特都冇答，不過𠵱家佢篤定唔連任，更加唔使搞助選工程，民望高低亦唔影響佢晉身政協副主席，咁今次開放日，梁特仲會唔會搞親民show呢？真係要到時先知。