【名門】告崇𤥃轉行健身:好想成功

【名門】告崇𤥃轉行健身:
好想成功

曾是騎師、現職練馬師的告東尼於本月初贏得從練累積頭馬1,100場的勝利,絕對是香港賽馬史上的一個關鍵名字。告東尼的細女告崇𤥃(Antonia)前年回流香港,推廣健身運動平台Apps。自小受父親感染熱愛運動的她,更視他為心目中的英雄,學習其堅毅鬥心,作為解決問題的出路。

三十歲出頭的告崇𤥃遺傳了父親告東尼,身形不算高䠷,但擁有新加坡模特兒母親林寶蓮的精緻輪廓,以廣東話談吐時充滿外語口音,笑言有時辭不達意。在國際學校讀書的Antonia,大學時在英國讀法律,畢業後曾在香港、新加坡及大馬三地從事股票買賣工作七年,現回流香港,推廣健身運動平台初創企業GuavaPass,出任總經理一職,她說:「冇諗過做法律相關工作,唔適合我個性。第一份工去咗做炒股票,個市好差同工作壓力好大,做得唔係咁開心,啱啱我識得個朋友開緊一個關於運動平台,自己又鍾意做運動,就決定去幫手。」

【瑜伽】
愛做運動的Antonia已練到難度高的瑜伽動作。

【舉重】
Antonia嘗試接觸肌肉訓練的運動,抓舉時全神貫注。

Antonia推廣的手機程式GuavaPass,可選擇使用多個亞洲城市的運動會所。

40歲前冒險

轉行從頭開始,Antonia自言有點驚:「做呢類startup好想佢成功,要用好多時間同勤力,以前做金融由清晨6點起身,做到黃昏6點先收工,𠵱家有時做到深夜3、4點,周末搞活動、做PR,不過細個可以冒險試唔同嘅嘢,過咗四十歲唔會試,太過辛苦。」告東尼凝聚一家團結,在她眼中更是心目中的英雄:「未見過其他人好似爹哋咁勤力,咁多年佢都係凌晨4點起身,對職業好認真,冇呢啲勤力精神、全心奉獻係唔會成功,佢會教同鼓勵我工作唔好放棄,要諗辦法解決問題,呢個都係我哋家庭核心價值。」

告東尼抱着小時候的Antonia,一臉滿足。

Antonia指父親告東尼的勤奮精神,是家中核心價值。

鬥心難與父比

Antonia回憶小時候父親為保持體重,食飯時得個「睇」字,還要去焗桑拿出汗:「我哋真係好幸福,我哋遇到問題相比,唔係真係好難,佢咁嘅生活,令到佢好強。」Antonia雖對爸爸讚不絕口,但笑言好難挑戰他的鬥心,不過自言在性格上遺傳了爸爸的惡脾氣,尤其在團體工作上追求嚴格。
採訪:梁錦雯
攝影:林德雄、郭賢興
場地提供:Odinson(瑜伽、舉重)、Ursus Fitness(拳擊)