平日最鍾意嘟嘴自拍、高調現身、自稱「撐警大聯盟」召集人嘅李偲嫣，唔知係咪因為俾人篤爆私自挪用兩個團體名義去籌款，噚日佢就少有地喺「全港市民支持（七警）簽名大行動」街站鬼祟現身，唔單只戴晒黑超同鴨嘴帽，仲留得嗰幾分鐘就低調走人，八方連聽聽偲嫣開咪撐警嘅機會都冇，非常可惜。
不過，偲嫣低調啲都啱嘅，日前「撐警大聯盟有限公司」同「警察隊員佐級協會」先話冇授權佢用「撐警大聯盟」聯盟標誌嚟為七警籌款；警察隊員佐級協會主席陳祖光仲嚴正聲明，話籌款同協會無關，表明只會喺警務處長准許下先會做內部籌款，擺明叫人小心「不明來歷」嘅籌款喎。難怪，偲嫣雖然仲用緊「撐警大聯盟」個名搞活動、擺街站，噚日街站工作人員就冇再提籌款，相信個籌款活動都變咗「唔講就唔存在」。