現年42歲的無綫娛樂新聞台主播李漫芬，昨日與靚仔游泳教練男友談成坤（Alvin）在尖沙嘴朗庭酒店結婚擺酒，筵開23席，陳煒及Kawaii擔任姊妹，曾志偉、劉松仁、米雪、楊怡、楊思琦、岑麗香、許志安和傅嘉莉等均有到賀。
李漫芬穿上性感婚紗接受訪問，應記者要求與老公又攬又錫，她指由前晚上頭喊到昨早接新娘，昨晚婚禮又再灑淚：「爸爸有病時，我叫佢唔好咁快走，話仲未斟茶畀你，佢答我好，可惜第二日就移民咗去天堂，今朝斟茶feel到爸爸喺旁邊。以前換燈泡都係靠自己，𠵱家知道有錫自己嘅人喺屋企，我最辛苦嘅時候，一個人住90呎劏房，幾辛苦都捱過。」
近日紅事白事兩邊忙的曾志偉昨謂心情複雜：「未平復，兩位好朋友都後生我咁多，魯芬都話知佢有病，胡家驊係冇先兆。」胡家驊愛駒「喜蓮獎星」昨贏得女皇銀禧紀念盃冠軍，志偉說：「許晉亨好好，幫家驊上去捧杯，我信佢睇到。」
採訪：馬建華
攝影：仇志德
