鄭秀文（Sammi）同張孝全合演嘅新戲《合約男女》已經上映，日前Sammi突襲銅鑼灣時代廣場一間戲院，答謝觀眾買飛捧場，兼交流觀後感。不過fans似乎一早收到風，在場大部份都係佢嘅fans，Sammi同fans傾偈兼玩遊戲。
總共去咗兩間戲院嘅Sammi，喺其中一場遇到兩位女觀眾講到喊，原來佢哋都經歷過戲中講小產嘅情節，Sammi即安慰。觀眾又讚Sammi嘅角色好跳脫，脫離以前做戲嘅格式，冇咗《孤男寡女》同《嫁個有錢人》嘅感覺。
Sammi對觀眾欣賞部戲，反應又好，覺得好開心滿意，佢話：「除咗有笑位，仲有感動到喊嘅位，見到觀眾睇到喊都好開心，即係有驚喜，亦感受到主角嘅悲傷。」佢仲話想同張孝全再合作：「睇上天安排，希望下次可以一齊做動作、懸疑，唔好浪費我嘅身手！」
安仔同台好自然
另外，Sammi日前同老公許志安出席太陽城集團晚宴時合唱，Sammi話：「真係好耐冇，只係幾句台上面一頭一尾，成件事好自然，冇刻意做乜。」會唔會夫妻檔合作？Sammi即刻耍手擰頭話：「幕前唔好搞，本身好多合唱歌，合唱做音樂會比演戲好。」
撰文：馮仁昭