吳啟華同內地嫩妻石洋子離婚後，關係一直好好，除咗會帶埋個囡囡熙兒一齊去旅行，啟華去年仲同前妻石洋子同圈中朋友趙碩之、周美欣等人，一齊去咗沖繩旅行㖭，當時佢回覆傳媒話同前妻唔係復合，同對方關係就好似多咗個大女咁。咁日前啟華趁有空就帶住囡囡熙兒去咗又一城行街街，真係一個好爸爸！而圈中出名嘅好爸爸又豈止吳啟華一個呢？
首先梗係要講吓，陳錦鴻呢個超級好爸爸，50歲嘅錦鴻04年同杜雯惠結婚，三年後誕下兒子駕樺，其後錦鴻發現兒子患有自閉症，曾經停工做全職爸爸教導兒子，仲出書《正視》分享教導自閉兒童嘅心得，當時佢就話親嘗愚公移山之苦，單單教囝囝上廁所就花咗五年時間。14年駕樺亦好叻豬，有辜負到父母對佢嘅教導，考取全級第一名，認真叻仔。
除咗錦鴻，仲有三年抱三嘅陳豪，佢同陳茵媺13年結婚，之後三年抱三，誕下梓燁、浩鋒同凱婷，兩仔一女，一家五口好幸福咁生活，陳豪呢個多個公，仲好努力咁賺錢，養起成頭家，認真係一個負責任嘅真男人；好爸爸！此外，張家輝雖然忙到癲，但一有時間便會陪太太關詠荷和女兒張童。為了讓愛女接受更優質教育，早年特登由西貢搬到名校林立的港島居住。
最後係古天樂，冇寫錯呀，佢係08年拍過一齣電影，就叫《一個好爸爸》。相信如果古仔做老竇，都一定會非常愛錫仔女。