曾俊華嘅特首競選標誌係兩座山，競選辦曾經話一座係太平山，一座係獅子山。噚日薯片叔叔就上載一幅喺獅子山下一條行天橋、同競選辦成員嘅合照，攝影師仲「低抄」薯片叔叔，令獅子山頓成佢同一班競選辦成員嘅背景。
薯片叔叔話好多路都係冇前車可鑑，話「新獅子山精神，亦正留待新一代人重新詮釋。」新獅子山精神曾經喺雨傘運動時被詮釋為追求真普選、公義民主，薯片今次認真大膽喎，擺明要同泛民站喺同一陣線。佢又話老一輩的獅子山精神係推崇不畏難苦、同舟共濟，新一代港人所追求嘅事情已經有所不同，唔再停留於搵食謀生呢個層次，因物質富裕、高學歷市民越嚟越多，市民對社會制度、對公義、對生活，都有更高層次嘅追求。