大家仲記唔記得18歲生日嗰陣做咗乜？嗱嗱臨去換身分證、定即刻去戲院睇三級片？意大利天才門將基安盧基當拿隆馬上個星期六18歲生日，AC米蘭周日先有作客薩斯索羅嘅意甲聯賽，而呢間米蘭球會好鬼有心，特製咗一段生日短片畀當拿隆馬，令佢感動到流馬尿㖭！唔知係咪驚曼聯會出手爭呢位新保方呢？
收AC生日短片落淚
喺上星期六當拿隆馬18歲生日嗰日，AC米蘭高層就借啲意叫佢上去office坐低，話有嘢傾，仲叫佢睇咗段片先；點知原來段片係AC米蘭職球員包括CEO加里安尼等，以及當拿隆馬嘅親朋戚友甚至係女朋友艾麗莎（Alessia Elefante）祝佢生日快樂，搞到當拿隆馬起初眼濕濕，最後仲忍唔住流埋眼淚㖭。之後，當拿隆馬就梗係同靚靚女友艾麗莎慶祝，仲上載埋同艾麗莎嘅合照到自己instagram。
真‧保方送上祝福
「新保方」之稱嘅當拿隆馬已經收到另一個驚喜生日祝福，就係真正嘅鋼門保方祝佢生日快樂。喺意大利時間上個星期六凌晨12點時，大過當拿隆馬21年嘅保方就透過《意大利天空體育》話：「你好，當拿隆馬，我係保方，祝你生日快樂，並且祝你成為偉大嘅球員！好好享受你嘅生日啦！」
的確，當拿隆馬喺場上表現出嘅冷靜同決斷，同佢嘅年齡完全唔相符，所以目前除咗穩佔AC正選龍門位置外，意大利國家隊亦有兩次出場，叫佢做新保方真係冇誇張；而英國傳媒報道，曼市雙雄都對當拿隆馬甚感興趣，其中曼聯更加係簽入呢名被標價4,000萬鎊（約3.9億港元）新星嘅大熱門。據英國《太陽報》報道，曼聯一直留意住當拿隆馬嘅表現，因為紅魔正選門將迪基亞盛傳可能喺今夏選擇轉投皇家馬德里，所以領隊摩連奴希望能羅致「新保方」以未雨綢繆囉！