雷神莫雷拉今午（26日）賽前累積連勝43個賽日，不斷打被香港紀錄，個人自去年9月25日刑滿復出以來日日有馬贏，卒之跑到今午（26日）香港金盃賽馬日，佢搏足全日最叻都係第二冇頭馬見面，個人長勝紀錄告終。
本來最尾第十場二班1600米，雷神仍有機會建功，佢騎大摩馬房新勝馬「無敵飛龍」留放一絕，直路看似可建功之際，臨門竟被今季一直冇贏馬的馬主潘蘇通，憑名下生力軍「大雄圖」夥拍巫斯義後上擊敗，「無敵飛龍」還要和「怪獸家長」平頭瓜分亞軍，今日注定天亡雷神，要佢食白果被迫斷纜，難怪賽後他一臉茫然。
不過，由莫雷拉一手炮製的香港騎師連贏43個賽日，仍是一個超強紀錄，相信除咗佢自己之外，未來一段時間都幾難有人破到。
講番尾場賽果，告東尼馬房「大雄圖」是去年英國雅士谷2400米一班讓磅賽英皇佐治五世錦標冠軍，身價必高，今仗在港初出即勝，沿途守八九位，末段沿欄直上一攻而破贏0.75馬位，姿態大把在手，單Win及組合獨贏A3分別派168.5及34元。
四歲英國自購馬「大雄圖」有報名今屆香港打吡，贏出今場後評分突破90分，勢將拎到一個打吡參賽席位，而巫斯義因馬主愛將蘇銘倫冇合適航班來港客串，冷手執個熱煎堆勝出「大雄圖」，錄得個人季內在港首捷。
尾場一頭一尾1號「無敵飛龍」同14號「怪獸家長」平頭雙亞軍，第四名由「小米周」跑獲。至於騎師王則由田泰安以一分之微力壓梁家俊勝出。